జనం బలం

మనం ఒక్కటైతే ఈకాలం తల ఒగ్గుతుంది

జనం ఒక్కటైతే ఈకాలం గతి మారుతుంది

వాన కురుస్తుంటే

జడివాన కురుస్తుంటే

చేయి చేయి కలిపి నిలిచి

ఛత్రంగా మారుదాం

నీడలేని వారి కొరకు

నిలువు నీడలవుదాం                ....మనం....                

ఎండలు కాస్తుంటే

గుండె రగులుతుంటే

చేయి చేయి కలిపి నిలిచి

చలివేంద్రాలం అవుదాం

నీటితోటి ప్రపంచాన్ని

నిలువెల్లా తడిపేద్దాం               ...మనం...

చలిగాలులు ముసిరితే

శీతలకాలం కసిరితే

చేయి చేయి కలిపి నిలిచి

నెగళ్లుగా మారుదాం

నిండుమనసుతో

పుడమిని విలువెల్లా కప్పేద్దాం               ...మనం...

చెట్టు విరిగింది.

24-12-85

కలల వీధిలో కనులు మూసుకుని

       ఇన్నాళ్లూ నే పయనిస్తున్నా

కళ్లు తెరిచి మరి చుట్టూ చూస్తే

       కలల రంగులే కరిగి పోయెనా

ఊహలకెప్పుడు రెక్కలు ఉంటై

ఊహలకెప్పుడు రెక్కలు ఉంటై

నిజం నిప్పులా మెరుస్తున్నది

నిజం వెలుగులా నిలుస్తున్నది.

ఖుషీ తలపులో, ఖుషీ వలపులో

ఖుషీ ఖుషీ మరి వలపు తలపులో,

తలపుల నడకకు రాయి తగిలినా,

చెట్టు విరిగినా, నిజం మలుపులో

సుఖం కథల్లో, సుఖం వ్యథల్లో

సుఖం సుఖం, మరి వ్యథల కథల్లో

ఆకలి కడుపున అగ్గి రేగినా,

కలం కదిలినా, నిజం బాధలో

రక్ష సేయరా ఓ పక్షివాహనా

లక్షలుగ దండాలు నీకు

మా పక్షమున నిలిచేవు గనుక

సూక్ష్మములను తెలియలేము

దీక్షలునూ చేతగావు

లక్ష్మణునికి వలెను సేవ

సాక్షిగ మా తరము గాదు .....      రక్ష

శిక్షజేసినను నీవ

మోక్షమిచ్చినను నీవ

అక్షయముగ కరుణ జూడు, ని

ర్లక్ష్యమేలరా తండ్రి .....             రక్ష

సుఖము కోసము దుఃఖమది ఎందుకో

ఇహముకోసము ఇడుములవి ఎందుకో

భద్రముగ రేయెల్ల భజన గానమ్ముండ

నిద్రరాలేదన్న వగపెందుకో

తలమీద నీ అభయహస్తమ్ము తానుండ

గొడుగులేదేమన్న గొడవెందుకో

వంకలేనటువంటి కదలీ ఫలములుండ

టెంకాయ లేదన్న తెగులెందుకో

మోక్షమార్గమ్మది ముందు తానుండగా

సూక్ష్మముల కోసమీ సుడులెందుకో

భవనామమనియేటి భవ్యపాయసముండ

తీపి కారములకై దిగులెందుకో

సాయుజ్యమది తాను సాధింపబడియుండ

పై మెట్టు కోసమీ పరుగెందుకో

పాట 2

నానోట నీమాట పలికినంతనె

మాట సురభిళమ్మాయెనయ్యా

తనువు పులకితమ్మాయెనయ్యా

నాకంట నీ రూపు కాంచినంతనె

జగము కాంతిమంతమ్మాయెనయ్యా

మనసు శాంతివంతమ్మాయెనయ్యా

చేతులను నీ భజన జేసినంతనె

యొడలు పావనమ్మాయెనయ్యా

జన్మ స్నాపితమ్మాయెనయ్యా

ఓప్రభూ నీ మోల నిలిచినంతనె

అహము మాయమై పోయెనయ్యా

ఇహము నీవెయై పోయెనయ్యా

 పాట 3

అందగాడంటేను అతనే గదా

ఎందులో లేని సౌందర్యమదిగూడి

ఎదుట నిలిచిన రూపు తానే గదా

పద్మములబోలు పాదములు అవియే గదా

పాపముల గడుగు పాదములు అవియే గదా

స్వామి అడుగిడిన భువియంత దివియే గదా

కళల వెలిగెడు కరములవియే గదా

అభయమిచ్చెడు కరములవియే గదా

స్వామి కరము సోకిన బతుకు ధన్యము గదా

వేల సూర్యుల వెల్గు మేనదిగదా

వెన్నెలలు చిందేటి మేనదిగదా

స్వామి సామీప్యమందుటే ధన్యతగదా

సూర్యచంద్రుల మించు కనులవి గదా

కరుణ వెదజల్లెడు కనులవి గదా

స్వామి వీక్షణకటాక్షమే చాలును గదా