Poetry Original and Translated!

అవసరాలు

నాకు కొంచెం ఆలోచన కావాలి

నిద్రపోతున్న నా మెదడుకు కొంచెం పని కావాలి

నాక్కొంచెం అలసట కావాలి

నేల విడిచి బతుకుతున్ననాకు పిడికెడు ప్రపంచం కావాలి

తలదాచుకునేందుకు నిలువెత్తు నీడ కావాలి

అందంగా చీవాట్లు పెట్టగల ఆదరణ కావాలి

నాక్కొంచెం ఆకలి కావాలి

నాక్కొంచెం ఆశ కావాలి

చీకట్లను చిదపడానికి నాకొక దివ్వె కావాలి

కదలకుండా కూచున్న నాకు కారే చెమట కావాలి

నాక్కొంచెం కన్నీరు కావాలి

ఊపిరిలో ఊపిరిగా నడిచే గుంపు కావాలి

కలిసి చేరుకోవడానికో గమ్యం కావాలి

అరిగి పోయిన బతుకును తెంపే కొత్తదనం కావాలి

నాదనిపించే స్వంత బుర్ర కావాలి

అక్షరాలను నాటేందుకు మెదళ్లు కావాలి

ఆగిపోయావని చెప్పే ఆవేదన కావాలి

నిలువునా ముంచెత్తే వాన కావాలి

కసిగా తగిలే ఎదురు దెబ్బ కావాలి

కళ్లనిండా సుళ్లుగా నీళ్లు కావాలి

నేను మరోసారి మనిషిని కావాలి

నన్ను నడిపించే ఆలోచన కావాలి

నాకు కొంచెం ఆలోచన కావాలి

@@@@@@@@@@@@@@@

ఆలోచనా లోచనాలు

మరో సారి తెల్లవారిందని అసంతృప్తి

మనం కూడా పడక వదలాల్సినందుకు అసంతృప్తి

పిల్లలింకా లేవలేదని అసంతృప్తి

పని మనిషి రాలేదని అసంతృప్తి, వచ్చిందనీ అసంతృప్తి

పులుసులో ఇంగువ మింగలేక అసంతృప్తి

అందరూ వెళ్లిపోయి ఇల్లు ఖాళీ అయిందని అసంతృప్తి

తాళం వేయాల్సి వచ్చిందని అసంతృప్తి

బస్టాపులో బజ్జీల బండివాడు కంగాళీ తిండి అమ్ముతున్నాడని, తినని నాకు అసంతృప్తి

నా పని నేను చేయాలని అసంతృప్తి

మిగతావారు తమ పని చేయడం లేదని అసంతృప్తి

ఎవరో ఏదో అన్నారని అసంతృప్తి

ఎవరూ ఏదీ అనలేదని అసంతృప్తి

నిజానికి ఈ ప్రపంచానికి కావలసింది మన అసంతృప్తి

దాన్ని ఇంత సులభంగా పంచిపెడుతున్నామని అసంతృప్తి!!