ముప్ఫయి మూడు

మనిషికి ముప్ఫయి మూడేళ్లు వచ్చినా ప్రజలు మాత్రం వాణ్ణింకా కుర్రవాడు అనడం మానరు. అతనికి కూడా తనలో ఏ మార్పూ కనిపించక పోవచ్చు. కా నీ ఒక అపనమ్మకం. తానింకా నిజంగా కుర్రవాడేనా?

అతను ఓ శుభోదయాన నిద్ర లేస్తాడు.

ఆరోజు అసలు తనకు జ్ఞాపకం ఉంటుందా?

పడక మీంచి పైకి లేవడు-

సూర్యుడి వేడివాడి కిరణాలు గుచ్చుకుంటాయి.

శుభోదయం - ఈరోజు గడుస్తుందా?

వెలుగు భరించలేక కళ్లు మూసుకుంటే-

జీవితం అంతా తుడిచి పెట్టుకుపోయి...

ఊబిలోకి కూరుకుపోతాడు.

అంతా నాశనం! తన గొంతు తనకు వినిపించదు!

అధఃపాతాళానికి – అస్తిత్వం – సమసిపోయి –

కరిగిపోయి – మారిపోయి – మాసిపోయి –

అంతంతకీ లోతుకి –

మళ్లీ తెలివి కలిగితే –

తనూ మనిషే – ఒక ఆకారం – ఒక వ్యవహారం.

లేవాలి – జీవితాన్నెదురుకోవాలి

నూతన శక్తితో – జ్ఞాపకశక్తితో----

అబ్బ! ఏం జ్ఞాపకశక్తిది!

అదీ ఇదీ అన్నీ జ్ఞాపకమున్నాయా? – ఎప్పటిలాగే!

గతజీవీతాన్ని తోడుకోవాలా గడిచిన రోజులూ నడిచిన బాటలూ -

కష్టించి మెదడు లోతుల్లోంచి

బయటికి తీయాలి.

ఈ వల వేసి తన చుట్టు తానే –

తనను తానే పట్టుకోవాలి -, అప్పుడు

కాలం గడిచింది.

తానెవ్వరు? తానేమయినాడు?

వలవేసింది తనే -

వలలో పడిందీ తనే -

ఇప్పటి వరకు రోజులు గడుస్తున్నాయ్-

రోజూ ఏదో చేస్తూనే ఉన్నాం.

ఏదైనా చేయవచ్చు-

ఏమైనా కావచ్చు-

మహావ్యక్తి, తాత్వికుడు, తార్కికుడూ, ఏమైనా-

కార్యశూరుడూ, కావిగుడ్డలు కట్టి, కాడి చేతబట్టి,

గంజి, గటకా, తాగి, చెమటతో పుడమిని తడిపి, ---మౌనంగా----

అవును మాటలెందుకూ-

కాదంటే, కుళ్లిన, వయసు మళ్లిన సంఘానికి నిప్పంటించి చలి కాచుకునే వైప్లవి-

జనాలను జాగృతం చేస్తూ, జైల్లో మగ్గుతూ, బాధలూ, అపజయాలూ, విజయాలూ,

లేదంటే---

జ్ఞాని, వేత్త, - జీవితంలోని ఆనందం వెతుకుతూ, సంగీతంలో, సాహిత్యంలో, దేశాల్లో, శాసనాల్లో, మళ్లీ పుట్టబోతామా?, ఈ  అందం, ఈ ఆనందం, అంతా ఇప్పుడే.

హుమ్! మనిషికి ఎన్ని ఆలోచనలు, ఎన్ని ప్లానులు

అసలిన్నాళ్లూ ఏం చేసినట్లు?

ఒంట్లో సత్తువ ఉంది, వయసు ఉంది,

అందుకని ఏది దొరికితే అది చేస్తూ-----

ఈ పూటకు భోజనం-----

మీ పిల్లలకు ట్యూషన్ చెపుతా!

మూడు రూపాయలు దినానికి,

ఓ! మట్టి తట్టలెత్తుతా-

తీరిక వేళల్లో తైత్తిరీయం వ్యాఖ్యానం చదువుతూ-

ఏం చేయాలి? ఏది చేయాలి?

గుడ్డల షాపులో గుమాస్తాగా---- రాజీనామా,

పత్రికలో పడుతున్నాను, వ్యాసాలు, వ్యవసాయాలు, బట్టతలపై జుట్టు,

నిత్యం వార్తల కొట్టు,-----ఛీఛీ,--

జేబుల్లో చిల్లరైనా లేకుండా రైలెక్కాను,

ఎవరిచ్చారీ పతా - నాకు తెలియదు – నాకూ తెలియదు -

ఇక్కడా అక్కడా – ఊరూరా--- తిరుగుతూ ----

ఇదేం బాగులేదు – చదువుకుంటే, ఏదైనా చేస్తే –

లాయర్ – డాక్టర్ – ఇంజనియర్ ---- ఏదయినా  ---

చదువు – పరీక్ష – పాస్ –

ప్రతి అడుగునా ఆహ్వానం – దోస్తీ – ప్రేమ –

అన్నీ చేయవచ్చు – తుడిపేయవచ్చు,

ఈ ప్రపంచానికి నోటీసు జారీ చేస్తూ----

ఃఃఃఃఃఃఃఃఃఃఃఃఃఃఃఃఃః

ఈ రంగస్థలంపై – ముప్ఫైమూడేళ్లకు తాను – అందరి ముందూ తాను – చప్పట్లు –

నేనేం చేయగలను – ఉన్న వెయ్యిన్నొక్క అవకాశాల్లో వెయ్యి చెల్లిపొయినట్లున్నాయి –

అసలన్నిటిలోనూ – నిజంగా తనకు పనికి వచ్చేది – ఒకటే కాదూ – అందుకేనేమో –ఆలోచన మానకుండా – భయం అన్నది ఎరుగక – చివరికి ఈరోజు చిక్కిపోయి ఇలా ----

ఈ 33కు కూడా – యిలా వర్షాలతోనే – ఎండలతోనే – తనకూ నెలన్నా, ఈ ఎండలన్నా – నక్షత్రాలన్నా, రాశులన్నా ఎంతో యిష్టం –

ఆ నక్షత్రాల మీద అభిమానం ఇప్పుడు లేదు – పోయింది –

ఈ నెలంతా ఎండ – ఉక్క – చిరాకు – చికాకు –

మూటా ముల్లే సర్దేసి – గది వదిలేసి – గతాన్ని వదిలేసి – పారిపోవాలి –

తప్పించుకుని ------

ఈ సంవత్సరమన్నా స్వేచ్ఛగా –

ఈ గదీ – ఈగోడలూ – ఈ మనుషులూ –

అన్నిటికీ దూరంగా –

పాలవాడూ – పేపరువాడూ – డబ్బులివ్వాలి – ఇంటివాళ్లకు చెప్పాలి –

లేకుంటే అప్పులు – భవబంధాలు కాదూ –

మళ్లీ తనపాతచోటికే –

తన్నుతాను గుర్తించిన – నిద్రనుంచి మేల్కున్న

ఆ పాతచోటికే –

గది ఖాళీయే –ఏదో చిల్లర వస్తువులు తప్ప – ఈ చెత్తంతా ఏ చేయాలి

పుస్తకాలు బొమ్మలు, నిక్ నాక్స్ – సర్పరాయి, ఎక్కడినుంచి వచ్చినయి ఇవన్నీ

ఏమిటీ బొమ్మ నాలుగు గుర్రాలూ – ఆరు కా ళ్లూ – రెండు తలలూ – ఒకటే నీడా –

అర్థం లేదు – అంతపెద్ద సూర్యుడు – అర్జునుడు మాత్రం అరంగుళమే – నీడలు మూరెడు -----

మసరబారి మాసిపోయిన బొమ్మలు - ---

ఉట్టి బొమ్మలేకదా ----- పడెయ్ -----

ఈ చిపిగిన సిల్కు చొక్కా - దుమ్మ కొట్టుకుని – ఈ గవ్వలూ – ఈ రాళ్లూ ---

ఎండిపోయిన గులాబీ – ఎవరికీ అందకుండానే వాడిపోయి – ఎండిపోయి –

పోస్టుచేయని ఉత్తరాలు – ప్రియతమా – మహారాజ్ఞీ – గురువుగారూ ---

మంటకు అన్నీ సమానమే --- బూడిద –

కాలుతున్న పేజీల్లో కదులుతున్న అక్షరాలు –

గాలిలో కలుస్తున్న అక్షరాలు

ఃఃఃఃఃఃఃఃఃఃఃఃఃఃఃఃఃః

చుట్టూ ఉన్న జనాలనుంచి తప్పించుకోవాలి ---

కొత్తవాళ్లను కట్టుకోగూడదు

తనింక జనాల్లో బతకలేడు

ఈ మనుషుల మధ్య తను మైనపు ముద్దగా –

ఎవరిష్టం వచ్చిన రూపం – వాళ్లిస్తుంటే –

కనకిష్టాయిష్టాలూ – అస్తిత్వమూ లేవా –

లాభం లేదు – తనరూపం తనకుంది – ఉండాలి –

ఇకమీద లాభం లేదు – ఇక్కడ ఈ మనుషున మధ్య ఇది వీలయ్యేపనా

అందుకనే అక్కడికి – ఆ పాతచోటికి – తిరిగిపోయి ------

ఃఃఃఃఃఃఃఃఃఃఃఃఃఃఃఃఃఃః